Xəbərlər

21 noyabr 2025-ci il tarixində Bakıda keçirilən D-8 Media Forumunda Azərbaycanda D-8 İqtisadi Əməkdaşlıq Təşkilatının Media Mükəmməllik Mərkəzinin yaradılması istiqamətində strateji plan müzakirə olunub. Media Mükəmməllik Mərkəzinin strateji planı forum iştirakçılarına təqdim edilib. Günün sonuna qədər media ekspertlərinin və D-8 ölkələrinin dövlət rəsmilərinin tövsiyələrinin Media Mükəmməllik Mərkəzinin strateji planına daxil edilməsi istiqamətində işlər aparılacağı bildirilib.

Bu sözləri jurnalistlərə açıqlamasında Medianın İnkişafı Agentliyinin İcraçı direktoru Əhməd İsmayılov deyib.

"Düşünürük ki, gələcəkdə də belə media forumlarının keçirilməsi Azərbaycanın və həmin ölkələrin media subyektləri arasında əlaqələrin inkişaf etdirilməsinə dəstək olacaq. Hazırkı müzakirələr onu göstərir ki, bütün dövlətlər məhz belə bir media forumunun keçirilməsini dəstəkləyir və bunun illik əsasda keçirilməsi üçün müvafiq bəyanatla çıxış edəcəklər", – deyə Əhməd İsmayılov diqqətə çatdırıb.

O əlavə edib ki, Media Mükəmməllik Mərkəzi Azərbaycan Prezidentinin təşəbbüsü ilə yaradılıb.

"Mərkəzin yaradılmasında məqsəd D-8 ölkələrindəki media subyektlərinin əməkdaşları arasında əlaqələrin genişləndirilməsi, həmin media subyektləri tərəfindən dezinformasiya və saxta xəbərlərlə mübarizə aparılması, eyni zamanda, media sahəsində ixtisasartırma, xəbərlərin hazırlanması prosesinin təşkili və layihələrin həyata keçirilməsidir" – deyə Medianın İnkişafı Agentliyinin İcraçı direktoru bildirib.

4-cü Şuşa Qlobal Media Forumu çərçivəsində D-8 Media Mükəmməllik Mərkəzinin strategiyasının təqdimatı keçirilib.

Tədbiri giriş sözü ilə açan Azərbaycan Respublikası Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev bildirib ki, sürətlə dəyişən informasiya mühitində etibarlı məlumat mübadiləsinin təmin edilməsi, peşəkar jurnalistikanın təşviqi və dezinformasiyaya qarşı birgə mübarizə dövlətlər arasında əməkdaşlığın vacib istiqamətlərindəndir. O, Prezident İlham Əliyevin təşəbbüsü ilə yaradılmış D-8 Media Mükəmməllik Mərkəzinin bu baxımdan müstəsna əhəmiyyət daşıdığını vurğulayıb, Mərkəzin üzv ölkələrin media qurumları arasında əlaqələrin möhkəmləndirilməsinə, təcrübə mübadiləsinin genişləndirilməsinə və ortaq təşəbbüslərin həyata keçirilməsinə töhfə verəcəyini bildirib.

D-8 Təşkilatının Baş katibi Sohail Mahmud isə diqqətə çatdırıb ki, üzv dövlətlər arasında vahid, etibarlı və konstruktiv informasiya mühitinin formalaşdırılması üçün media sahəsində əməkdaşlığın gücləndirilməsi mühüm əhəmiyyət kəsb edir. O qeyd edib ki, Media Mükəmməllik Mərkəzi üzv ölkələrin media qurumları arasında əməkdaşlığın institusionallaşdırılmasına, təcrübə və bilik mübadiləsinin genişləndirilməsinə, eləcə də media sahəsində yaranan müasir çağırışlara qarşı koordinasiyalı yanaşmaların formalaşdırılmasına xidmət edəcək. Baş katib bu təşəbbüsü D-8 çərçivəsində media sahəsində əməkdaşlığın yeni mərhələyə keçidi kimi dəyərləndirib.

"Media Mükəmməllik Şəbəkəsi"nin Baş direktoru Fuad Mərdiyev tərəfindən Mərkəzin yaradılması zərurəti, strateji hədəfləri və fəaliyyət istiqamətləri barədə ətraflı məlumat verilib. O qeyd edib ki, media sahəsində sürətli rəqəmsal transformasiya, süni intellekt texnologiyalarının geniş tətbiqi, dezinformasiya təhdidlərinin artması və qlobal informasiya mühitində baş verən dəyişikliklər D-8 İqtisadi Əməkdaşlıq Təşkilatına üzv dövlətlər arasında daha sıx əməkdaşlığı zəruri edir.

Bildirilib ki, Mərkəzin əsas məqsədi D-8 ölkələri arasında media sahəsində əməkdaşlığın gücləndirilməsi, peşəkar potensialın artırılması, tədqiqat və innovasiyaların təşviqi, eləcə də bu sahədə vahid yanaşmaların formalaşdırılmasıdır.

Təqdimat zamanı D-8 Media Mükəmməllik Mərkəzinin institusional quruculuq, beynəlxalq mövqeləndirmə, əməkdaşlıq mexanizmlərinin yaradılması, təcrübə mübadiləsi, media tədqiqatları və dezinformasiyaya qarşı mübarizə istiqamətində nəzərdə tutulan fəaliyyətləri diqqətə çatdırılıb.

Həmçinin vurğulanıb ki, Mərkəzin fəaliyyətinin növbəti mərhələlərində üzv dövlətlərin media qurumlarını birləşdirən əməkdaşlıq şəbəkəsinin yaradılması, birgə layihələrin həyata keçirilməsi, beynəlxalq təşkilatlarla tərəfdaşlıqların genişləndirilməsi və media sahəsində qabaqcıl təcrübələrin paylaşılması nəzərdə tutulur.

Tədbir siyasi şərhçi Ülviyyə Zülfiqarın moderatorluğu ilə keçirilib.

Media Mükəmməllik Şəbəkəsi Nigeriya Respublikasının Müstəqillik Günü münasibətilə Nigeriya xalqını səmimi-qəlbdən təbrik edir.

1 oktyabr Nigeriyanın müstəqillik tarixində mühüm əhəmiyyət daşıyan, milli birlik, suverenlik və inkişaf yolunda əldə olunan nailiyyətləri təcəssüm etdirən əlamətdar gündür.

Bu əlamətdar gün münasibətilə Nigeriya xalqına sülh, sabitlik, rifah və davamlı inkişaf arzulayırıq.

Media sahəsində beynəlxalq əməkdaşlığın, peşəkar təcrübə və bilik mübadiləsinin, həmçinin müasir media texnologiyalarının inkişafının ölkələr və xalqlar arasında qarşılıqlı anlaşmanın gücləndirilməsinə mühüm töhfə verdiyinə inanırıq.

Media Mükəmməllik Şəbəkəsi Azərbaycan ilə Nigeriya arasında, eləcə də D-8 İqtisadi Əməkdaşlıq Təşkilatına üzv ölkələrin media qurumları arasında əməkdaşlığın daha da inkişaf etdirilməsinə və media sahəsində qarşılıqlı təcrübə mübadiləsinin genişləndirilməsinə böyük əhəmiyyət verir. Bu əlamətdar gündə Nigeriya Respublikasının rəhbərliyinə və xalqına sülh, tərəqqi və firavanlıq arzulayırıq.

Müstəqillik gününüz mübarək, Nigeriya!

26–28 noyabr 2026-cı il tarixlərində Bakıda D-8 Təşkilatı üzv ölkələrinin media nümayəndələri üçün süni intellekt mövzusunda intensiv təlim proqramı keçiriləcək.

D-8 Təşkilatına üzv ölkələrin media nümayəndələrinin peşəkar bilik və bacarıqlarının inkişaf etdirilməsi, onların müasir texnoloji yeniliklərə uyğunlaşmasının dəstəklənməsi və rəqəmsal media sahəsində beynəlxalq təcrübə mübadiləsinin genişləndirilməsi məqsədilə "Süni İntellekt Dəstəkli Jurnalistika və Rəqəmsal Media İnnovasiyaları" mövzusunda təlim proqramı keçiriləcəkdir.

26–28 noyabr 2026-cı il tarixlərini əhatə edəcək təlimdə D-8 Təşkilatına üzv ölkələri təmsil edən 20-yə yaxın jurnalist və media mütəxəssisinin iştirakı nəzərdə tutulur.

Üç gün davam edəcək proqram çərçivəsində iştirakçılara jurnalist fəaliyyətində generativ süni intellekt alətlərindən səmərəli istifadə, prompt mühəndisliyi, böyük həcmli məlumatların emalı və təhlili, süni intellekt vasitəsilə yaradılmış məzmunun və məlumatların yoxlanılması (fact-checking), eləcə də rəqəmsal platformalar üçün müasir məzmunun hazırlanması və auditoriyaya uyğunlaşdırılması üzrə bilik və praktiki bacarıqlar təqdim olunacaqdır.

22–23 oktyabr 2026-cı il tarixlərində Bakı şəhərində ACNC-nin birinci iclası planlaşdırılır.

22–23 oktyabr 2026-cı il tarixlərində Bakı şəhərində D-8 İqtisadi Əməkdaşlıq Təşkilatının Media Mükəmməllik Mərkəzi Milli Koordinatorlarının Məsləhət Şurasının (ACNC) birinci iclası keçiriləcək.

İki gün davam edəcək iclas çərçivəsində D-8 Media Mükəmməllik Mərkəzinin əsas fəaliyyət istiqamətləri və qarşıdakı dövr üzrə prioritetləri, eləcə də növbəti iki il üçün Fəaliyyət Planı müzakirə ediləcək.

Tədbirdə, həmçinin Məsləhət Şurasının və İşçi Qrupun növbəti iclaslarının keçirilmə yeri və tarixlərinin müəyyənləşdirilməsi nəzərdə tutulur.

Media Mükəmməllik Şəbəkəsi Azərbaycan xalqını Müstəqilliyin Bərpası Günü münasibətilə ürəkdən təbrik edir.

18 oktyabr Azərbaycan tarixinin ən əlamətdar səhifələrindən birini təşkil edir. 1991-ci ildə bu gün qəbul edilmiş Müstəqillik Bəyannaməsi xalqımızın öz müqəddaratını özünün müəyyənləşdirmək hüququnu bərpa etdi, dövlətçilik yolunda yeni bir eranın başlanğıcını qoydu.

Media Mükəmməllik Şəbəkəsi olaraq inanırıq ki, güclü, müstəqil və peşəkar media milli dövlətçiliyin əvəzsiz dayaqlarından biridir. Azad informasiya mühiti, şəffaf jurnalistika və ictimai müzakirə mədəniyyəti demokratik dövlətin möhkəmlənməsinə birbaşa töhfə verir.

MEH-in missiyası da məhz bu dəyərlərə söykənir: D-8 ölkələri arasında media sahəsində peşəkar standartların yüksəldilməsi, əməkdaşlığın gücləndirilməsi və informasiya mühitinin etibarlılığının artırılması.

Bu əlamətdar gündə Azərbaycan xalqına sülh, sabitlik, tərəqqi və firavanlıq arzulayırıq.

Müstəqilliyin Bərpası Günüz mübarək!